તો લખો- સુરેશ દલાલ

મે 11, 2010

તમને તારાઓની બારાખડી ઉકેલતાં આવડે છે ?
– તો લખો.

તમને ફૂલોની પાંખડીમાં પ્રવેશતાં આવડે છે ?
– તો લખો.

તમને ક્ષણની આંખડીમાં કશુંક આંજતાં આવડે છે ?
– તો લખો.

તમને રણના વિષાદને મૃગજળથી માંજતાં આવડે છે ?
– તો લખો.

તમને આંખમાં આવેલા વાદળને નહિં વરસાવતાં આવડે છે ?
– તો લખો.

તમને મેઘધનુષને સુક્કી ધરતી પર વાવતાં આવડે છે ?
– તો લખો.

તમને લોકોની વચ્ચે તમારી સાથે રહેતાં આવડે છે ?
– તો લખો.

તમને તમારાથી છૂટાં પડતાં આવડે છે ?
– તો લખો.

તમને કંઈ પણ આવડતું નથી
એ અવસ્થા પર ઊભા રહેતાં આવડે છે ?
– તો લખો –

– સુરેશ દલાલ

Advertisements

તમે મારા દેવનાં દીધેલ છો

મે 10, 2010

તમે મારા દેવનાં દીધેલ છો,
તમે મારા માંગીને લીધેલ છો,
આવ્યાં ત્યારે અમર થઈને રો’.

મહાદેવ જાઉં ઉતાવળી, ને જઈ ચઢાવું ફૂલ,
મા’દેવજી (જ્યારે) પ્રસન્ન થયા, ત્યારે આવ્યા (તમે) અણમૂલ;
તમે મારું નગદ નાણું છો, તમે મારું ફૂલવસાણું છો.
– આવ્યા ત્યારે અમર થઈને રો’, તમે મારા દેવનાં.

હનુમાન જાઉં ઉતાવળી, ને જઈ ચઢાવું તેલ,
હનુમાનજી પ્રસન્ન થયા, ત્યારે ઘોડિયા બાંધિયા ઘેર;
તમે મારું નગદ નાણું છો, તમે મારું ફૂલવસાણું છો.
– આવ્યા ત્યારે અમર થઈને રો’, તમે મારા દેવનાં.

સંપાદક : ઝવેરચંદ મેઘાણી

આ ગુજરાત છે !

એપ્રિલ 12, 2010

અહીં પ્રેમ કેરો સાદ છે
પ્રભુજીનો પ્રસાદ છે
ને પ્રકૃતિનો વરસાદ છે !
બૉસ, આ ગુજરાત છે !

અહીં નર્મદાનાં નીર છે
માખણ અને પનીર છે
ને ઊજળું તકદીર છે !
યસ, આ ગુજરાત છે !

અહીં ગરબા-રાસ છે
વળી જ્ઞાનનો ઉજાસ છે
ને સોનેરી પરભાત છે
અલ્યા, આ ગુજરાત છે !

અહીં ભોજનમાં ખીર છે
સંસ્કારમાં ખમીર છે
ને પ્રજા શૂરવીર છે !
કેવું આ ગુજરાત છે !

અહીં વિકાસની વાત છે
સાધુઓની જમાત છે
ને સઘળી નાત-જાત છે
યાર, આ ગુજરાત છે !

અહીં પર્વોનો પ્રાસ છે
તીર્થો તણો પ્રવાસ છે
ને શૌર્યનો સહવાસ છે !
દોસ્ત, આ ગુજરાત છે !

– રોહિત શાહ

પાંદળુ કેવી રીત પીળું થયું કોને ખબર ? રમેશ પારેખ

એપ્રિલ 11, 2010

પાંદળુ કેવી રીત પીળું થયું કોને ખબર ?
એટલે કે ઝાડમાંથી શું ગયું કોને ખબર ?

શહેર પર ખાંગી થઈ વરસી પડી આખી વસંત,
એક જણ નખશિખ ઊજ્જડ રહી ગયું કોને ખબર ?

શાહીમાંથી આમ કાં ઢોળાય છે તારા સ્મરણ
એને મારું એક મન ઓછું પડ્યું કોને ખબર ?

સ્વપ્નમાં વહેતી’તી નહેરો તારા ચહેરાની સતત,
ને સવારે આંખમાંથી શું વહ્યું કોને ખબર ?

માછલીએ એકદા જળને પૂછ્યું : તું કોણ છે ?
એના ઊત્તર શોધવા જળ ક્યાં ગયું કોને ખબર ?

મેં અરીસાને અમસ્તો ઉપલક જોયો “રમેશ”,
કોણ એમાંથી મને જોતું રહ્યું કોને ખબર ?

મારો પરિવાર..

એપ્રિલ 10, 2010


મારો પરિવાર એટલે
સાંજ…
દરિયો…
રેતી…
ઉદાસી…
અને
હું…

-Dee’s world !

Hello world!

એપ્રિલ 8, 2010

Welcome to WordPress.com. This is your first post. Edit or delete it and start blogging!